कैलाली, श्रावण ९ — कैलाली जिल्लाको गोदावरी नगरपालिकाबाट प्रहरीले करिब डेढ किलो लागू औषध चरेससहित चार जनालाई एकै दिन पक्राउ गरेको छ।
इलाका प्रहरी कार्यालय मालाखेतीबाट खटिएको विशेष प्रहरी टोलीले बिहीवार राति गोदावरी नगरपालिका–२ स्थित बझाङ विपिन होटलमा छापा मार्दा एक जनालाई एक किलो चरेससहित नियन्त्रणमा लिएको हो।
प्रहरीका अनुसार पक्राउ परेका व्यक्ति बझाङ जिल्ला छबिसपाथिभारा गाउँपालिका–७ निवासी ३९ वर्षीय गगन बोहरा हुन्। उनीसँगै बरामद गरिएको चरेसको तौल एक किलो रहेको इलाका प्रहरी कार्यालय मालाखेतीका प्रमुख डिएसपी रणबहादुर चन्दले जानकारी दिए।
डिएसपी चन्दकै कमान्डमा खटिएको टोलीले थप अनुसन्धानका क्रममा सोही क्षेत्रमा संलग्न अन्य तीन जनालाई समेत पक्राउ गरेको जनाएको छ। ती व्यक्तिहरूको परिचय र उनीहरूसँग बरामद चरेसको परिमाण भने सार्वजनिक गरिएको छैन।
पक्राउ परेका व्यक्तिहरूमाथि लागू औषध सम्बन्धी कसूरमा अनुसन्धान अगाडि बढाइएको प्रहरीले जनाएको छ। जिल्ला प्रहरी कार्यालय कैलालीले लागू औषध नियन्त्रण अभियानलाई तीव्र बनाउँदै गइरहेको छ।
