काठमाडौं । विश्वको सबैभन्दा शक्तिशाली मानिने राष्ट्र अमेरिकामा अहिले एक अकल्पनीय मानवीय संकटको बादल मडारिएको छ। अक्टोबर १ देखि जारी सरकारी कामकाज ठप्प (गभर्मेन्ट सटडाउन) ले देशको अर्थतन्त्रलाई मात्र होइन, अब सिधै करोडौं नागरिकको भोकमाथि प्रहार गर्ने भएको छ। यो ‘सटडाउन सगा’ ले गर्दा लाखौं अमेरिकी नागरिकका लागि सञ्चालित निःशुल्क भोजन कार्यक्रमहरूमाथि गम्भीर संकट देखिएको छ।
ट्रम्प प्रशासनले जारी गरेको एक सूचनाअनुसार, नोभेम्बर १ देखि कुनै पनि संघीय खाद्य सहायता उपलब्ध गराइने छैन। अमेरिकी कृषि विभाग (USDA) ले आफ्नो वेबसाइटमार्फत सार्वजनिक गरेको यो खबरले देशभरका लाखौं परिवारका लागि गम्भीर संकटको संकेत दिएको छ, जो दैनिक जीवनयापनका लागि ‘फुड स्ट्याम्प्स’ (पूरक पोषण सहायता कार्यक्रम) मा निर्भर छन्। यस सूचनाले अमेरिकाका करिब आठमध्ये एक नागरिकलाई किराना सामान किन्न सहयोग पुर्याउने यो महत्वपूर्ण कार्यक्रममाथि पूर्णविराम लगाउन खोजेको छ।
यो नयाँ सूचना ट्रम्प प्रशासनले ‘फुड स्ट्याम्प्स’ कार्यक्रमलाई नोभेम्बरसम्म जारी राख्न आवश्यक करिब पाँच अर्ब अमेरिकी डलरको आकस्मिक कोष प्रयोग नगर्ने निर्णय गरेपछि आएको हो। अमेरिकी कृषि विभागको सूचनामा भनिएको छ, “सत्य के हो भने सरकारी कोष समाप्त भइसकेको छ। नोभेम्बर १ मा कुनै पनि भत्ता जारी गरिने छैन। हामी सिनेट डेमोक्र्याटहरूका लागि एउटा महत्वपूर्ण मोडमा पुगेका छौँ।” यसले राजनीतिक दाउपेचको भूमरीमा नागरिकको आधारभूत आवश्यकता कसरी पिल्सिरहेको छ भन्ने स्पष्ट पार्छ।
डेमोक्रेटिक सांसदहरूले कृषि सचिव ब्रुक रोलिन्सलाई पत्र लेखी आकस्मिक कोष प्रयोग गर्न अनुरोध गरेका थिए। तर, शुक्रबार सार्वजनिक भएको अमेरिकी कृषि विभागको विवरणअनुसार, उक्त आकस्मिक कोष कानुनी रूपमा विपदग्रस्त क्षेत्रका मानिसहरूलाई सहायता पुर्याउने कार्यका लागि मात्र आरक्षित गरिएको छ। त्यसैले, खाद्य सहायता नपाउने सम्भावनाले दुवै दलद्वारा शासित राज्यहरूमा गम्भीर चिन्ता उत्पन्न गरेको छ। राजनीतिक र कानुनी जटिलताको यो चक्रमा लाखौं गरिब तथा असहाय नागरिकको पेटमाथि खेलवाड भइरहेको देखिन्छ।
अक्टोबर १ देखि सुरु भएको यो सरकारी कामकाज बन्द अब रेकर्डमा दोस्रो सबैभन्दा लामो बन्दको रूपमा स्थापित भइसकेको छ र एक महिना नाघ्ने अवस्थासम्म पुगेको छ। यस्तो लामो सरकारी बन्दले अत्यावश्यक सेवाहरूमा मात्र होइन, नागरिकको आधारभूत आवश्यकतामा समेत कटौती गर्नु आफैंमा एक आश्चर्यजनक र दुःखद घटना हो। विश्वको नेतृत्व गर्ने दाबी गर्ने देशमा आफ्नै नागरिकलाई खाना खुवाउन नसक्नु, त्यो पनि राजनीतिक खिचातानीका कारण, मानवीय मूल्यमाथि नै प्रश्न खडा गर्छ। तत्काल यो संकटको समाधान खोज्न आवश्यक छ ताकि करोडौं अमेरिकी नागरिक भोकमरीको चपेटामा पर्नबाट जोगिउन।
