नवलपरासी । नारायणी नदीमा सनिवार बिहानदेखि पानीकाे बहाव बढ्न थालेकाे छ । त्रिवेणी गण्डक व्यारेजमा सनिवार बिहान ११ बजे गरिएकाे मापन अनुसार पानीकाे बहाव १ लाख २९ हजार क्युसेक पुगेकाे छ ।
पानी बहावकाे याे मात्रा यसवर्ष अहिलेसम्मकाे धेरै हाे । वर्षायाम शुरू भएदेखि नारायणी नदीमा पहिलाे पटक पानीकाे बहाव १ लाख क्युसेकलाइ नाघेकाे हाे । त्रिवेणी व्यारेजमा गरिएकाे मापन अनुसार पानीकाे मात्रा सनिवार बिहानदेखि लागातार रूपमा बढ्दाे क्रममा रहेकाे छ ।
यसवर्ष वर्षा बढि मात्रामा हुने र बाढी पहिराेकाे जाेखिम बढ्ने बताइएपछि नरायणी नदीकाे तटीय क्षेत्र सुस्ता गाउँपालिकाकाे वडा नं. ३, ४ र ५ मा पर्ने गाउँका स्थानीय वासीन्दामा त्रास सिर्जना गरेकाे छ । नारायणी नदीमा बाढी बढेपछि तटीय क्षेत्रका वासिन्दामा वर्षेनी चाैबिसै घण्टा त्रासमा समय बित्ने गर्छ ।
बाढी नियन्त्रणकाे लागि भारतले गर्नुपर्ने काम पुर्ण मात्रामा नगरिएकाेले स्थानीयमा चिन्ता बढेकाे छ । भारतमा संसदीय निर्वाचनकाे कारण गण्डक क्षेत्रमा बिनियाेजित रकम पनि समय उपलब्ध नभएका कारण मर्मतसंभारकाे काम प्रभावित हुन पुगेकाे हाे ।
